No, nn’è overo ca tutte t’hanno amato,

chist’è ’o paese addó sulo chi è mmuorto

pò avé ’o bbène ca cu ll’arte ha rato,

e mmaie n’artista,’e chesto, ave scunfuorto.

’A nosta è na città c’alleverisce

sultanto quanno tu te ne sì gghiuto,

primma te dice corna opuro allisce

e ddoppo comm’ô meglio sì tenuto.

Ma tu l’he ditto già tant’anne areto

ca Napule se veste ’e mille pezze

d’ogne culore e pparla ogn’arfabbeto

e se fa grossa ’e glorie e dd’ ’e mmunnezze.

A nnuie ce abbasta ’e sèntere ’a puisia

dint’a sta voce ’e blues e melodramma

mpastata ’e note e cchiéna d’armunia

ca mpietto scarfa comme fósse fiamma.